مسكة الإيد هي حكايتنا

ستوري برس – عبير محمود

حارتي بسوريا، ما بتعرف الطائفية طريق إلها.. عشنا سوا متل ما بتنبت شجرة وحدة من جذور متشابكة، جيران وأصحاب وأهل. إذا إجا عيد، منزين بيوت بعض ونفرح كأنو العيد إلنا كلنا، إذا مرض واحد منّا، منلمّ مصاري العملية كأنو هالمريض فرد من عيلتنا، أطفالنا بيروحوا عالمدرسة بإيدين ماسكة بعض، ما بيعرفوا شو يعني “أنت من طائفة وأنا من غيرها”. بيعرفوا بس إنو الطريق طويل والخطر أكبر إذا مشي الواحد لحالو.

مسكة الإيد هي حكايتنا.. هي العهد إنو ما منفلّت بعض، لا من أزمة ولا من حرب ولا من وجع، يمكن حاولت الأيام السوداء تفرّقنا، بس الحقيقة إنو زرع التعايش يلي كبر فينا من صغرنا أقوى من أي شي بالكون.

اليوم وبعد ما طوى البلد صفحة قاسية، منرجع نكتب حكايتنا نحنا، حكاية الناس يلي بتحب بعضها، يلي بتعرف إنو الحارة بلا أهلها ما إلها روح، ومن هون، من قصص الحارات السورية، رح يبلّش وطن جديد، مبني على إيدين ماسكة بعض، وما بتفلت أبداً.